Hestoria

La oveya xalda pertenez al tueru del Ovis aries celticus. Amás de polos restos arqueolóxicos calteníos en dellos castros, persabemos que los astures teníen oveyes, al traviés de dos cites d’autores clásicos: una recoyida nel Edictum Diocletiani de Pretiis Rerum 25, nel que se fala de la llana “Asturicensis” ya otra nel llibru III de la Geographika d’ Estrabón (H. 29-7 e. C.) au se fala del “sagus” o túnica que vistíen davezu estos puelos, que yera de llana prieto pos esi yera la color de les sos oveyes.

Na fundación del Monesteriu d’Oubona (Tinéu), nel añu 780, apaecen inventariaes “triginta oves”.

Nes ordenances d’Uviéu nel añu 1274 dizse:

«Primeramientre de la carne: Establecemos que la carne del carnero daquí asturiano, que vala el quarto del mellor e mui bono diez y ocho dinero».

Nel Llibru Tumbo del Monesteriu de Balmonte (Miranda) atopamos:

«En este año de 1604 valen los corderos en esta tierra cinco o seis reales de un año, que es como suelen darlo al Monasterio.»

En 1701 el Monesteriu de Balmonte aforó otra vuelta a los vecinos del llugar de Cuevas por 150 años. Pagaben añalmente, de mancomún, 330 riales y amás, cada cincuenta años, un carneiru d’encabezamientu; un vecín yera’l que faía’l pagu en nome de toos. L’últimu carneiru entregarónlu l’añu 1801.

Les Ordenances Conceyiles d’Arenas de Cabrales de 1726, recoyíen nel Capítulu 16, que los vecinos que tuvieren oveyes ya cabres, curiaríen por breda d’un día’l rabañu que se fixera colos marones, embaxo una multa d’ocho riales ya dos díes desiguíos si faltaren a esi compromisu. El día conseñáu p’axuntar los marones nel corral del Conceyu yera’l 25 xunetu. Los Celadores ya dos téunicos duechos ordenaben la capía de los aldraques ya escoyíen los de bona castra ya enforma enllanaos pa padriar.

Nes Ordenances Xenerales del Principáu d’Asturies de 1781, col enfotu que miedren les cabanes ganaderes, proponíense premios enforma bonos ya ventaxes nos pascones a los vecinos que mantuviesen doce vaques paridiegues, un cientu oveyes o un cientu cabres.

En 1782 Xovellanos al falar sobro l’armentíu de los vaqueiros, repara na so reciella ya descríbela asina:

«Ye verdá qu’estos ganaos son pequenos; les sos oveyes pareciénonme un mediu ente les merines ya les churres comunes, quiciabes pela curtia alzada que fan añalmente, o bien pola clas del herbáu que pastien, punxo lo nidio de les sos llanes metanes de les otres dos frasques.»

Nesti mesmu sieglu XVIII nel Catastru del Marqués de la Ensenada fálase d’una Asturies con 595.000 exemplares d’ovín, 353.307 de vacunu, 278.448 gochos, 197.874 cabres ya 28.111 caballeríes. Aquestos ciensos puen caltenese fasta metanes del sieglu XIX.

Nel sieglu pasáu, na década los 40 entama’l desaniciu la xalda, por mor de les plantaciones nos montes comunales d’especies foriates, amenorgando asina en munches de les traveseres aú pastaben. Conceyos del occidente como Tinéu, Allande, Salas, Eilao, etc., sufrienon grandemente la plantación dafechu nos sos montes vecinales. En llugares como Brañaivente (Salas), fonon condergaos los sos vecinos a la emigración a Alemaña, Bélxica… por mor de “La Forestal”, que-yos quitó los pastos nos que l’armentíu, la reciella ya los corros guarecieren milenta años. Nun hai d’escaecer tamién que nel oriente, les xaldes fonon camudaes por otres castres (carranzana, latxa) más llecheres, empobinaes a la producción del quesu: Cabrales, Camonéu, etc.

N’otros llugares, la falta de xente, de pregueiros, fexo tronar la vecera: «Acabó porque la xente foi arraleciendo.»

Sicasí, na decada los 40 viéndense munches xaldes (sobro manera andoscos) pa L.laciana ya’l Bierzu (Llión). Al Partíu de Sierra (Cangas del Narcea) diben buscales los traximanes a puelos como Mieldes, au yeren abondosos los rabaños, ya nes feries d’El Puertu (Sumiéu) ya Tinéu; el ciensu oficial nesta dómina inda algamaba les 293.080 oveyes, siendo xaldes la maoría.

Cuando en 1982 descríbese la oveya xalda, el so ciensu yera menguáu (malapenes 800 femes en tol Principáu). Daquella nun cuayó la idega de fer una Asociación por falta de xente. El númberu de femes foi amenorgando, asina como los marones. (En dellos rabaños yá nun yeren xaldos). Atopámonos entós con una reciella cola clas dafechu, pero aveyuscadina.

Ello foi en 1992 cuando a la fin s’entamó dende l’Asociación de Criadores d’Oveya Xalda la so recuperación.

La xalda, como yá viemos, ye una oveya d’aniciu celta mesmo que la Ouessant de la Bretaña, la Cochddu (prieta galesa) del País de Gales, la Morite (oveya de los parmos) de les Islles Shetland n’Escocia, la Skudde, la Weibe Gehörnte Heidschnucke ya la Moorschnucke d’Alemaña.

La Vecera

Pa falar de la vecera, sigo dafechu’l perbon trabayu que fixere el Equipu Bueida nel conceyu quirosán, ya que foi espublizáu na revista Cultures nel 1991.

La Vecera ye una complexa organización que’l puelu entama pa curiar amestada tola reciella (oveyes ya cabres) que tien caúna de les unidaes familiares. Vecera ye tamién el nome que se-y da a esi rabañu.

La reciella yera un complementu económicu perimportante na vida’l campesín. L’aportación proteínica que se sacaba d’ella yera fundamental nuna dieta alimenticia abondo probe.

De les oveyes ya cabres aprovechábase’l lleche pa manxar mazao o pa fer queisu, amás de la llana y el pelleyu: «La llana vistía al pueblu tudu»

Nos puelos onde enxamás hebo vecera, a lo menos na alcordanza de la xente, ponse como sida lo llonxe de los pastos. La vecera tenía de salir ya tornar tolos díes al puelu. De parte branu llegábase fasta la encimada’l puertu. La distancia yera determinante pa que fore posible llevar ya trayer nel mesmu día la vecera. Poro, si’l puelu taba fondu nun-y trayía cuenta: «Nun tenemos vecera ¿nun ves que’l puertu ta mui l.l.ueñe?».

Nos llugares au les cabres nun yeren munches, estes diben coles oveyes. Tamién hebo cambeos: nel puelu Vil.l.axime (Quirós) solo había vecera d’oveyes pero tres la guerra civil la importancia del ganáu cabruno medró fasta que tuvienon de fer vecera d’oveyes ya vecera de cabres.

Pel iviernu, cuando les grandes nevaraes, la vecera podía nun salir. La reciella quedaba na corte ya chábase-y “fuechaos” que yeren feixes de carbayu, biduriu o freisnu. Si nun nevaraba la vecera salía, ya podía dixebrase en dos o más vecerucas. El tiempu yera malo, les femes paríen y había que baxar los oveyos al tornar, andaben los llobos.

Camudaba la organización: los turnos menguaben a la metada ya tocaba curiar ca menos tiempu: «La curia yera d’un die por ca seis uvechas. D’iviernu yera de cuatru uvechas un díe» Asina la vecera grande dixebrábase y yeren más los que curiaben.

Había tamién vecerina d’oveyos ya cabritinos. La vecera yera perdura pa les naciones, pos los pastos taben enforma llonxe. Asina la vecerina quedaba nos praos alredor del puelu o nuna fastera que s’acotaba na mortera. Esta mena de vecera entamábase al empar que la grande, anque enantes de dir en vecerina, los oveyos podíen tar nos corripios o nos praos de los dueños. Al rodiu de los meses de xunu o xunetu ya podíen dir colo otro.

Les Ordenances del Principau de 1781, dexen a les Xuntes d’Agricultura de cada Conceyu l’establecimientu de veceres en cada parroquia.

Al escomencipiar abril faíase una Xunta nos puelos pa recuntar la reciella de cada casa. Los díes de curia taben muncho bien midíos pa que’l repartu fore tamién bien permediáu. Les oveyes que sobraben a la hora de faer les cuentes del repartu de turnos teníense en cuenta pa la “correura” viniente. Entá se caltienen na alcordanza la xente caún de los detalles: «Yera seis uvechas ca díe a tolas correúras; si tres, un díe ca medias correúras, por cinco igual que por tres y por ocho igual que por seis»; «D’ivierno por cuatro curiabas un díe; por ocho, dos; por cinco una vuelta un díe y a la cuarta vuelta curiabas dos.»

D’otramiente «Al que tinía pocu tocaba-l.ly curiar de ralo en ralo». Tol mundiu sabía lo que tenía de curiar el vecín ya nun s’almitíen diferencies o xente que nun cumpliere la so parte.

La esistencia de multes ye clara. Persábese que naide podía dexar de cumplir cola so parte porque si non la vecera desfairíase de secute.

La breda pasaba de casa en casa percorriendo’l puelu dafechu ya siguiendo siempres el mesmu orde: «Ya se sabía la ruea per ande día. A la tarde, desque vinía, que recochía caún las suyas, había que l.l.evar la seña. Descuida, que nun se-l.l.y escaecía; tol mundiu tinía poca gana curiare.»

L’enemigu principal del rabañu yera la borrina: tresmanábense les oveyes ya podía venir el llobu. Pa esconxurar la nublina, los pregueros arrezaben daqué esconxuru, como ésti recoyíu en Salceo (Grau):

«Escampla nublina escampla
que ta’l llobu tres la campa,
cumiendu la uvea prieta ya
mirandu pa la blanca
que nin ya tuya nin mía
senón de la Virxe María.»

O este otro en El Pedrosu (Onís):

«Escampa nubladina escampa
Qu’anda’l llobu per Camba
Comió la oveya ñegra
Y pregunta pola blanca
Que non é tuya
Nin é mia
É de la Virxe María.»

Perspeutives Futures

El futuru de la oveya xalda ye favoratible dafechu. De magar s’iguó, l’Asociación de Criadores d’oveya xalda (ACOXA) vien fayendo un trabayu perimportante, cola recuperación del so ciensu, avenceyando añalmente a nueos criadores ya trabayando nel so Llibru Xenealóxicu.

Anguano hai rexistraes 508 femes ya 42 marones.

La so llana emplégase indagüei na confeición de fatos pal traxe’l país

La so crianza tá empobinada a la producción d´oveyos pa carne.

Oveyu Xaldu

Les carauterístiques organoléptiques de la carne xaldo nun s’asemeyen a les de los oveyos de races foriates que s’esparden per Asturies, cola mengua asina de la castra de nueso, a la que cuasi fonon quien a desaniciar cola sida del so rendimientu cárnicu, por aciu del so maor tamañu, ya l’atopase meyor dientro de sistemes de ganadería intensiva, nos que l’engorde antepónse a la cría natural. El réxime de ganadería estensiva nel quespoxiguen ya medren los rabaños xaldos con abonda estensión de terrén pa lo taliar, y allonxada dafechu del apetiguñamientu de les cortes ya cebaderos, ta llonxe de ser rentable pal pregueru, pero ye una seguranza pal consumidor nesti tiempu nel qu´abonden los escándalos sanitarios provocaos pola calidá de lo que comemos.

Ya lo que xintamos ye, nesti casu, un alimentu con un tastu que ye tan prestoso como peculiar, de xuru que más averao al cabritu qu’al oveyu al que tamos avezaos. Una carne con freba enforma ya tienro al empar, con frebes que rellucen ya de palpu sele, col sebu xusto pa que la freba nun sía seco y el platu s’añague en mantega.

Una carne asina, qu’adulces ta recuperándose n’Asturies dende’l farfagón nel qu’hebo tresmanase pa siempres. Porque la nuesa xalda raspíu’l so desaniciu como raza ya namái l’enfotu d’unos pocos tornó’l dexastre. A esos pocos axúntase vusté dende’l mesmu momentu nel que quier consumillo: los rabaños van medrar al son que-yos marque la demanda. Anque paeza paradóxico, delles vegaes xintar val tantu como caltener esa fastera de la natura que son les castres que mos ufren la so carne.